Благовещение Пресвятой Богородицы

Аще случится Благовещение Пресвятыя Богородицы в Среду Великую

Во Вторник вечера поем Вечерню без кафисмы, и без поклонов. На Господи воззвах, поставим стихов 10, и поем стихиры самогласны дне 5:

Глас 1: Во светлостех святых Твоих, како вниду недостойный? Аще бо дерзну совнити в чертог, одежда мя обличает, яко несть брачна, и связан извержен буду от ангелов: очисти Господи скверну души моея, и спаси мя яко Человеколюбец.

Глас 2: Душевною леностию воздремався, не стяжах Женише Христе, горяща светильника иже от добродетелей, и девам уподобихся буим, во время делания глумляся: утробы щедрот Твоих не затвори мне Владыко, но оттряс мой омраченный сон, возстави Милостиве, и с мудрыми введи девами в чертог Твой, идеже глас чистый празднующих, и вопиющих непрестанно: Господи слава Тебе.

Глас 4: Скрывшаго талант осуждение слышавши, о душе, не скрывай словесе Божия, возвещай чудеса его, да умножающи дарование, внидеши в радость Господа твоего.

Глас 6: Приидите вернии, делаим усердно Владыце: подавает бо рабом богатство, и по равенству кийждо многоусугубим благодати талант: ов убо мудрость да приносит делы благими, ов же службу светлости да совершает: да приобщается же словом верный, тайны ненаученному, и да расточает богатство убогим другий. Сице бо заимованное многоусугубим, и яко строителие вернии благодати, Владычния радости сподобимся: тоя нас сподоби Христе Боже, яко Человеколюбец.

Егда приидеши во славе со ангельскими силами, и сядеши на престоле Иисусе разсуждения, да мя Пастырю Благий не разлучиши, пути бо десныя веси, развращени же суть шуии. Да не убо с козлищи грубаго мя грехом погубиши: но десным мя сочетав овцам, спаси яко Человеколюбец.

И праздника 5, глас 6.
Подобен: Всю отложивше:

Совет превечный открывая Тебе Oтроковице, Гавриил предста, Тебе лобзая и вещая: радуйся, земле ненас