Седмица сырная: четверг

Седмица сырная: четверг

В среду вечера,

На Господи воззвах, стихиры, яко обычно.

Слава, и ныне, Богородичен.

Прокимен, глас 5: Боже, во имя Твое спаси мя, и в силе Твоей суди ми. Стих: Боже, услыши молитву мою, внуши глаголы уст моих.

Пророчества Иоилева чтение. [Глава 3, ст. 12 – 21.]

Тако глаголет Господь: да востанут и взыдут вси языцы на юдоль Иосафатову, яко тамо сяду разсудити вся языки яже окрест. Испустите серпы, яко предстоит обимание винограда: внидите, топчите, яко исполнь точило, изливаются подточилия, яко умножишася злобы их. Гласи прогласишася на поли судебнем, яко близ день Господень на юдоли судебней. Солнце и луна померкнут, и звезды скрыют свет свой. Господь же от Сиона воззовет, и от Иерусалима даст глас Свой, и потрясется небо и земля: Господь же пощадит люди Своя, и укрепит [Господь] сыны Израилевы. И увесте, яко Аз Господь Бог ваш, вселяяся в Сионе в горе Моей святей: и будет Иерусалим свят, и иноплеменницы не пройдут сквозе его ктому. И будет в той день искаплют горы сладость, и холми источат млеко, и вси источницы Иудины источат воды, и источник от дому Господня изыдет, и напоит водотечь сития {евр. ситтим} Египет в погибель будет, и Идумеа в поле погибели будет за озлобление сынов Иудиных, понеже пролияша кровь праведную на земли своей. Иудеа же во веки населится, и Иерусалим в роды родов. И взыщу крови их и не обезвиню: и Господь вселится в Сионе.

Прокимен, глас 6: Да уповает Израиль на Господа, от ныне и до века. Стих: Господи, не вознесеся сердце мое, ниже вознесостеся очи мои.

И Сподоби Господи в вечер сей:

На стиховне самогласен дне, глас 3:

Возсия весна постная, цвет покаяния, очистим убо себе братие, от всякия скверны, Светодавцу поюще рцем: слава Тебе, едине Человеколюбче.

Стих же глаголем: К Тебе возведох: И повторяем самогласен. Таже стих: Помилуй нас Господи: и мученичен:

Мученицы Твои Господи, верою утверждшеся, упованием известившеся, любовию Креста Твоего душевно соединившеся, вражие мучительство разрушиша, и улучивше венцы, со безплотными молятся о душах наших.

Слава, и ныне, Богородичен:

Первосвятая, Чистая, похвала сущи небесных чинов, апостолов пение, пророков сбытие, Владычице, приими молитвы наша.

Ныне отпущаеши: По Трисвятом, тропарь святому: Слава, и ныне, Богородичен его. Аще несть, тогда тропарь дне. Слава, и ныне, Богородичен, по гласу тропаря. Ектениа: Помилуй нас Боже: Поклоны 3 великия. Буди имя Господне: Благословлю Господа: Достойно есть: И отпуст. И исхождение в притвор. И бывает обычная литиа о усопших.

Разумно же да будет, яко в Палестине, еже есть во Иерусалимской стране, не прияхом от святых отец сотворяти совершенныя Литургии в среду и в пяток сырныя недели, ниже преждесвященныя: в та бо два дни поем Аллилуиа с поклоны вечер, и утро, якоже выше речеся.

По Вечерни же, в сих дву днех, ядим сыр и яица, соблюдающе и правило во святых отца нашего Никифора, патриарха Константинопольскаго, исповедника, глаголюща: подобает поститися монахом в среду, и пяток сыроястный. Отвращает же сие правило предание Иаковитское и тетрадитскую ересь.

В среду сырную вечер. Повечерие поем малое. И поем канон, иже в Минеи на ряду, в субботу хотящаго прилучитися святаго.

В четверток на Утрени,

По 1-м стихословии седальны Осмогласника, апостольския.

По 2-м стихословии седален Триоди, глас 5.
Подобен: Собезначальное Слово:

Четыредесятницу, и предочистительницу, апостоли вси днесь венчают, и постное время освящают у Христа Избавителя, и Воскресение Его предвозвещают всем, и молятся Господеви, помиловатися душам нашим.

Слава, тойже.
И ныне, Богородичен, подобен:

В Тебе надежды Дево Чистая, несумненно имущим, покров сущи от различных искушений, и обстояний, и бед лютых свободи я, молящи Сына Твоего со апостолы Его, и спаси вся воспевающия Тя.

Таже чтем слово святаго Анастасиа, игумена Синайския горы, и псалом 50.

Каноны же поем Осмогласника, и Минеи. А в нихже песнех поем трипеснцы, оставляем таковыя песни Осмогласника.

Трипеснец. Творение господина Иосифа, глас 4.

Песнь 4:

Ирмос: Услыша пророк:

Просияша в мире зарю богоразумия ученицы Твои Господи, и прелесть помрачиша прельщения, разорше омрачение. Тех молитвами Щедре, спаси поющия Тя.

Преддверия поста, подвигов благоплодии венчанная приемлют притекающих трезвенно песньми и пении таинственными, тщательно вернии вси стецемся.

Умерщвления ризы прием, в дерзость невоздержания облекохся окаянный: но Ты мя облецы Сыне Божий, одеждею светлою отрождения.

Житие мое лукавством, и всякою нечистотою скончася: но к Тебе всещедрому прибегаю, предварив убо спаси мя Христе Боже, Твоею благостию.

Богородичен: Зачала еси паче слова, и родила еси паче естества Богородительнице, Владычествующаго тварию. Егоже непрестанно моли, избавитися нам от всякаго гнева, Тебе ублажающим.

Иный. Глас 2:

Ирмос: Пришел еси от Девы:

Расточивше невоздержания мглу апостоли, учений ваших сияньми, просветисте воздержанием вся грешныя и праведныя, яко всехвальнии.

Якоже яснии бисерие Слова апостоли, вся украсисте воздержанием концы, и удоботворивше душ наших воистину ныне благородие.

Пещь страстей росою поста апостоли увядивше, вся человеки научисте, град сей некрадомый и жилище имети освящения.

Слава: Согреших паче всех человеков окаянный, и не покаяхся, яко Манассиа согреших: нравы покаяния ми сотвори Господи, прежде даже не разрешит мя смерть.

Богородичен: Тебе пристанище спасения, и стену нерушимую Богородице Владычице, вси вернии вемы: Ты бо молитвами Твоими от бед свобождаеши души наша.

Таже, ирмос: Пришел еси от Девы не ходатай, ни ангел, но Сам Господи воплощься, и спасл еси всего мя человека. Тем зову Ти: слава силе Твоей Господи.

Песнь 8:

Ирмос: Всяческая Владыко:

Земля вся Господи, Твоего хваления исполнися: всю бо обтече божественных ученик Твоих вещание божественное, из глубины неведения обращающее к разуму, поющую: благословите дела Господня Господа.

Благодать Божественная покаяния явися, спасение носящи, сея наслаждающимся, побед и подвигов, потов и болезней: темже тецы душе моя ко Владыце твоему, многих твоих прегрешений ищущи прияти прощение.

Поприще отверзеся богоданнаго воздержания, светло усрящем требующии милости: жаждет бо Благоутробный нашего спасения, и еже дати прощение простирается, ищущим Его усердно, и любовию работающим.

Постом заустися, мирствующею мыслию, напитай же душе Господа, благодеянием добродетели, брашна, яко благовонныя жертвы, приносящи Сему, и взывающи: дела благословите непрестанно Господа.

Богородичен: Всеми владычествующая, мольбы приемлющи Владычице рабов Твоих, святая Богородице, тьмы мя избави и огня негасимаго, зол моих множества очищающи Твоим ходатайством, и единою божественною Твоею молитвою.

Иный.

Ирмос: Устрашися отроков:

Вас якоже свет, Христос, в концы всея вселенныя апостолы давый, шедше, рече, научите во языцех: да в плоти Мя суща увидите воздержанием живуща, и вражию всю силу попирающа, и путь человеком являюща правый.

Явил еси грядущее Христе воздержание, во очищение человеком, страстей же отлучение: сим бо Твои апостоли благоугодиша, и светлии светильницы на земли явишася, проповедающе Господа в трех Лицех, во едином же Существе, всем воспевающим Его.

Языком проповедницы вы послани бысте от Учителя Христа, о ученицы, ученьми Божественными просвещати их помышления, страстей же и брашен удержаватися, желати же воздержания, и Господа знати Сего, и Создателя, и Творца всех и Благодетеля.

Благословим Отца, и Сына, и Святаго Духа, Господа.

Якоже иногда Каин убийца, не принесох души моея жертву непорочную Христе, нечистым разумом содержимь. Не возгнушайся мене приходяща к Тебе постом Спасе Преблагий, но призри на дары, яже любовию несу Тебе Боже мой, во время пощения.

Богородичен: Блаженное бысть чрево Богоматере, яко приимшее Слово, дебельством плоти от Нея смесившееся человеческому зраку, по ипостаси: и явися град Божий, в немже жити Вышний благоволи, и Господь Бог. Темже вопием Ти: радуйся благодатная, Чистая Богородице.

Хвалим, благословим, покланяемся Господеви:

Ирмос: Устрашися отроков благочестивых, сообразнаго души несквернаго тела, и устранися воспитанный в безмерном веществе, неутружден огнь: присноживущу же, изувядшу пламеню, вечнующая песнь воспевашеся: Господа вся дела пойте, и превозносите во вся веки.

И стихословится Честнейшую:

Песнь 9:

Ирмос: Яко сотвори мне:

Яко пламень миру послани бысте нелестный, избавляюще глубины грехов: воспеваем радостию Укрепившаго вас, яко апостолы Своя.

Яко вас миру объюродевшу, древле Христос яко соль посла мудрии, вразумляющия его к познанию Своему, восхваляем верно.

Яко множество прегрешений обдержит мя лютых, со слезами припадаю Ти Христе, прощения прося, благовремение ми подати во время поста.

Яко веригами нерешимыми связан моих страстей, стеню и взываю Ти Спасе: свободи мя, яко да пою прерадованно благоутробие Твое.

Богородичен: Яко показа Тя Бог, Дево Чистая, помощь роду человеческому, не престай прилежно молящи Его о нас верных.

Иный.

Ирмос: Невместимаго Бога:

Апостолов лик пост показа, вселенней всей возсияющий, и светлостию Божественною просвещающий мир.

Ученик Твоих Иисусе лик Человеколюбче, языческия роды научи, воздержания сокровиществовати богатство.

Дванадесятострунное вещание ученик Твоих состояние, воздержания богатство дарствует человеком, и источник спасения.

Слава: Блуднаго Ти гласом взываю Господи: Отче, согреших, спаси Щедре, да не славы Твоея отлучиши мя.

Богородичен: Во чреве Твоем Бога яко Человека поносившая, и живот миру источившая, Тя воспеваем Всесвятая Дево.

Ирмос: Невместимаго Бога, во чреве вместившая, и радость миру родившая, Тя поем Богородице Дево.

Светилен гласа.

На стиховне же поем самогласен дне, глас 3:

Возсия воздержания благолепие, бесовскую мглу отгонящее: прииде постная лепота, душевных страстей исцеление носящая. Сею иногда Даниил, и в Вавилоне отроцы ограждени, ов убо уста львов обузда, овии же пламень пещный угасиша. С нимиже и нас тоюжде спаси Христе Боже, яко Человеколюбец.

И повторяем сей, со стихом: Исполнихомся заутра:

Таже, стих: И буди светлость:

И мученичен: Яко светила в мире сияете, и по смерти святии мученицы, подвигом добрым подвигшеся. Имуще дерзновение, Христа умолите, помиловатися душам нашим.

Слава, и ныне, Богородичен:

В женах святая Богородице, Мати безневестная, моли Егоже родила еси Царя и Бога, да спасет ны яко Человеколюбец.

Таже: Благо есть: Совокупляем же и час 1, яко обычно. И отпуст.