Светлая седмица

Пятница Светлой седмицы. Живоносный источник

В пяток Светлыя седмицы на Утрени

канон Пасце, со ирмосы, на 8: и Богородицы, на 6:

Канон Пасце, глас 1:

Песнь 1.

Ирмос: Воскресения день, просветимся, людие: Пасха, Господня Пасха! От смерти бо к жизни и от земли к небеси Христос Бог нас преведе, победную поющия.

Припев: Христос воскресе из мертвых.

Очистим чувствия и узрим неприступным светом Воскресения Христа блистающася, и радуйтеся рекуща, ясно да услышим, победную ноюще.

Небеса убо достойно да веселятся, земля же да радуется, да празднует же мир, видимый же весь и невидимый: Христос бо воста, веселие вечное.

И канон Богородицы, егоже краестрочие: Никифору Каллисту ту Ксанфопулу.

[Ν] Ныне источи ми Дево Богородице источниче, благодать дающи Слова, яко да воспою Тя источник, вреющий живот и благодать верным: Ты бо ипостасное Слово источила еси.

[Ι] Врачевство паче естества, храм Твой Честная, является всем Отроковице: от смерти бо явныя притекающия верныя яве возставляет, и всем независтную точит сладость.

[Κ] Изливаеши с небесе неистощимо благодати воистинну едина: слепеюща бо твориши взирати к свету, блатом новым, возгласивши свыше паче смысла Леонови.

[Η] Общее любочестие человечества Честная, радуйся Марие, радуйся: всех бо Творец на Тя, якоже капля сниде явственно, источник Тя безсмертен показав Богоневестная.

Песнь 3.

Ирмос: Приидите, пиво пием новое, не от камене неплодна чудодеемое, но нетления источник, из гроба одождивша Христа, в Немже утверждаемся.

Ныне вся исполнишася света, небо же и земля, и преисподняя: да празднует убо вся тварь востание Христово, в немже утверждается.

Вчера спогребохся Тебе, Христе, совостаю днесь воскресшу Тебе, сраспинахся Тебе вчера. Сам мя спрослави, Спасе, во Царствии Твоем.

Богородицы подобны:

[Φ] Светлый Тя святый храм Владыки всех Отроковице вем, и нетления источник, воду изливающ Христа, от Негоже напаяемся.

[Ο] От Твоея благодати Владычице источниче, Самодержцу даеши исходов происхождение содержимо люте, камене подстояние страшное, водою разрешившееся.

[Ρ] Течет благодать независтная от Тебе, Богородице Дево, обильно точащая, хромии скачут о Тебе, прокаженных очищается множество, и демони угнетаются.

[Ο] Всем даеши исцеление верным, царем, простцем, нищим, князем, убогим, богатым обще, воду изливаяй источниче различное исцеление.

Кондак Пасце, глас 8:

Аще и во гроб снизшел еси, Безсмертне, но адову разрушил еси силу и воскресл еси, яко победитель, Христе Боже, женам мироносицам вещавый: радуйтеся, и Твоим апостолом мир даруяй, падшим подаяй воскресение.

Икос: Еже прежде солнца Солнце зашедшее иногда во гроб, предвариша ко утру, ищущия яко дне мироносицы девы, и друга ко друзей вопияху: о другини, приидите, вонями помажем Тело живоносное и погребенное, плоть Воскресившаго падшаго Адама, лежащую во гробе. Идем, потщимся, якоже волсви, и поклонимся, и принесем мира яко дары, не в пеленах, но в плащанице обвитому, и плачим, и возопиим: о Владыко, востани, падшим подаяй воскресение.

Седален, глас 8.

Подобный: Премудрости Слова:

Приснотекущий источник, и животный, источаяй струя божественный ток, согласно восхвалим благодати просяще: на кийждо бо день источает исцеления, яко рек течения показуяй малейшая. Темже по долгу приступающе с любовию, верно почерпем от источника неисчерпаемое здравие, воистинну безсмертное, орошающее верно благочестивых сердца: устнами возопиим, Ты еси верных утешение.

Песнь 4.

Ирмос: На Божественней стражи богоглаголивый Аввакум да станет с нами и покажет светоносна Ангела, ясно глаголюща: днесь спасение миру, яко воскресе Христос, яко Всесилен.

Мужеский убо пол, яко разверзый девственную утробу, явися Христос: яко человек же, Агнец наречеся: непорочен же, яко невкусен скверны, наша Пасха, и яко Бог истинен совершен речеся.

Яко единолетный агнец, благословенный нам венец Христос, волею за всех заклан бысть, Пасха чистительная, и паки из гроба красное правды нам возсия Солнце.

Богоотец убо Давид, пред сенным ковчегом скакаше играя, людие же Божии святии, образов сбытие зряще, веселимся Божественне, яко воскресе Христос, яко Всесилен.

Богородицы подобны:

[Υ] Паче песка воистинну, и каплий дождевных, быша Богородице множества, источника дел Твоих, непрестанно текущая на всю землю богатно, и всякаго боляща люте скоро исцеляющая.

[Κ] На стесненный жены от каркина сосец, вода возливается Дево, источника Твоего Владычице, и абие престаша страсти смертоносныя струею, и каркин просто изыти позна.

[Α] Недомыслимое в Тебе, и паче естества содеянное есть явственно Богородице: вода бо бывает источника Твоего исцеление, недугом смертоносным противное, егоже естество яве никогдаже ведяше.

[Λ] Присно умерщвляет мя враг сластными прилоги, Владычице источниче Богородице, не презри, предвари скорая помоще: сего же сетей мя избави, да воспою Тя присно многопетую.

Песнь 5.

Ирмос: Утренюем утреннюю глубоку и вместо мира песнь принесем Владыце, и Христа узрим правды Солнце, всем жизнь возсияюща.

Безмерное Твое благоутробие, адовыми узами содержимии зряще, к свету идяху, Христе, веселыми ногами, Пасху хваляще вечную.

Приступим, свещеноснии, исходящу Христу из гроба, яко жениху, и спразднуем любопразднственными чинми Пасху Божию спасительную.

Богородицы подобны:

[Λ] Глаголанная Дево Отроковице, источника Твоего воистинну чудеса, ужасают человеков помышление: паче бо естества суть, вся верныя освящающая.

[Ι] Повествова руно, манна и Силоам, и камень точащь, Соломонов притвор, благодать Твою, Иорданския воды, и источник самаряныни.

[Σ] Капли Твоя Отроковице Дево, яже источника, и мертваго оживиша, паче слова содеянное и смысла: вся бо Твоя Всечистая, слово побеждают человеческое.

[Τ] Страсти моя Отроковице исцели, кровотечения источник изсушающи, и лютое пламене возжжение, и здравия преложение, исходов союз, и чревотечение.

Песнь 6.

Ирмос: Снизшел еси в преисподняя земли и сокрушил еси вереи вечныя, содержащия связанныя, Христе, и тридневен, яко от кита Иона, воскресл еси от гроба.

Сохранив цела знамения, Христе, воскресл еси от гроба, ключи Девы не вредивый в рождестве Твоем, и отверзл еси нам райския двери.

Спасе мой, живое же и нежертвенное заколение, яко Бог Сам Себе волею привел Отцу, совоскресил еси всероднаго Адама, воскрес от гроба.

Богородицы подобны:

[Ο] Словеса Слова, яко воистинну источника, воспеваем Тя Чистая: премудрости бо глубину яко паче слова раждаеши, повесивша на воздусе течения, и землю на воде.

[Υ] Подшла еси лествиц несение, отъемлющее сокрушение иже тамо живописцов, о всесвятый источниче! спасаяй люди от труса дому падшия.

[Τ] Утробы неродящия неплодством прежде, разрешаеши яве, источника Твоего струями: ибо яко родившая Владыку всех, и рождения подаеши.

[Ο] Ни слово, ни ум, ниже язык Твое возмогут Чистая Рождество похвалити, но немощствуют в Тебе, и обличается философов честность, и риторов красота.

Кондак, глас 8.

Подобен: Взбранной:

От неистощимыя Ты, источниче богоблагодатный, подаеши ми, точащи воды Твоея благодати, приснотекущий паче слова: яко бо Слово рождшая паче смысла, молю Ти ся, ороси мя благодатию, да зову Ти: радуйся, водо спасительная.

Икос:

Нескверная Богородице, рождшая Слово Отчее, прежде век нетленно рождшееся, разшири моя уста, Чистая, спривносящи мя к Твоему похвалению, яко да восхвалю Тя, зовый источнику Твоему сия: радуйся, источниче радости непрестаемыя: радуйся, точе доброты неизреченныя. Радуйся, недугов различных разрешение: радуйся страстей всяких потопление. Радуйся струе световиднейшая, здравы творящая верныя: радуйся водо благодатнейшая недугующим многоразлично. Радуйся чаше манны животочныя: радуйся бане и нектарю богоизлиянный. Радуйся водо, премудрости неведение отъемлющая: радуйся растворение сердца, пищу божественную изливающее. Радуйся пристанище неможения источающая: радуйся пламень недугования угашающая. Радуйся водо спасительная.

Синаксарь на Пресвятую Госпожу Владычицу Богородицу, живоприемный источник.

В пяток Светлыя седмицы, празднуем обновление храма Пресвятыя и Госпожи нашея Богородицы, именуемаго живоноснаго источника. Еще же память творим изрядных и паче естества чудес бывших, во оном храме от Богоматере. Сей убо храм первее основася от царя Льва Великаго, иже и Макелл именовася. Сей понеже бяше благ и смирен человек, за доброе свое намерение и милостивное, еже имяше, прежде неже быти царю, обретаяйся во оном месте, обрете единаго человека слепаго, не видяща камо ити: и взем его за руку, ведяше. Достигшима же обоима тамо близ, идеже бяше сей источник, возжада слепый, и моляше Льва, да оросит его: иже идя во внутреннее оное леса, идеже бяше древес и насаждений различных исполнено, искаше воды, и не обретаяй источника, обращашеся аки отягчаемь. И слышит глас свыше глаголющь: о Льве! не унывай, зане вода, еяже ищеши, близ тебе есть, и обратися обрести ю. И Лев убо обращаяйся, и ищай много, не обрете ея. И паки слышит равный первому глас, и глаголет ему: царю Льве, вниди во внутреннюю часть загущеннаго сего леса, и возми своима рукама от сея мутныя воды, и исцели жажду слепаго, и помажи и помраченныя его очи: и абие познаеши, кая есмь, и от многаго времене живу на сем месте. Лев убо сотвори якоже глас повеле ему, и абие воззре слепый. И по Богоматере проречению, по мале времени бысть царь Лев: и созда тамо у источника храм первый, богатою рукою, якоже зрится днесь. И понеже бываху чудеса множайшая на всякий день, по многих летех Иустиниан великий самодержец греческий, понеже пострада зело от немощи водотрудия, и обрете тамо исцеление свое, хотя дати воздаяние Матери Божией, паки созда оный первый храм, и сотвори и величайший и краснейший, иже от многих трусов внегда разседеся, последи царь Василий Македонский, и сын его Лев Мудрый, паки создаша и исправиша и. Во время их сей источник многа чудеса действова: и вод задержания, и птисы, и иныя тмочисленныя страсти исцели: каркинския страсти, и кровотечения многих родов, имиже страждаху царевны и иныя жены, и различныя огневицы, и иныя болезни, и язвы неисцельныя, и неплодныя разреши: яко и царица Зои неплоды сущи прият дар от сего источника, сына Константина Порфирогенита. Воскреси же и мертваго, иже бе от Фессалии, и приходя ко святому источнику умре на пути. Егда же хотяше умрети, заповеда кораблеником взяти его тамо во храм источника, и возлияти на него три кади от оныя воды, и тогда погребсти его. Еже творяще корабленицы, и возливающе на него воду, абие воскресе мертвый. По многом же времени, хотя пасти великий храм оный, явися Богородица, и держаше его, дондеже изыде вон все множество людей, и никтоже вредися. Таяжде святая вода пиваема, многия беснуемыя исцели: и от темницы человеки связанныя разреши. Исцели же и царя Льва от каменозаятия, и жены его Феофаны угаси зельнейшую огневицу. И брата его Стефана разреши от птисныя немощи. Дарова же и слух Иоанну патриарху Иерусалимскому. Исцели еще и сильную огневицу Патрикиа Тарасиа, и матере его Магистриссы, и сына Стилианова исцели от водозадержания. И некую жену именем Схизину свободи от чревоболения. И царя Романа исцели, от разрешения и связания чрева таяжде вода, подобне и жену его. Призванием же токмо исцели Всесвятая монаха Пеперин, и ученика его в Халдеи. Подобне и монаха Матфеа, и Мелетиа, ихже оболгаша царю, свободи от гнева: Патрикиа же и Протоспафариа, и иныя тмочисленныя кто исповедати может? Несть же праведно не воспоминати и исцеления Исхиова: ниже кий язык может поведати, елика чудеса таяжде вода действова, и даже до днесь действует, паче каплей дождевных, и паче звезд небесных, и листов множества, яже в наша времена видехом. Еще исцели и иныя смертоносныя болезни, проказы, сверботы паче естества, и опухления женская, и душевныя страсти многия исцели, и различныя очныя болезни. Еще же исцели варагга Иоанна от воднотрудования, и другаго варагга исцели от злых язв, и священномонаха Марка от оспы, и каменозаятия монаха Захарию. И иная множайшая чудеса, яже не возможно есть исчислити, яже действова и действует непрестанно. Твоея Матере молитвами, Христе Боже наш помилуй нас. Аминь.

Воскресение Христово видевше: трижды. И Воскрес Иисус:

Песнь 7.

Ирмос: Отроки от пещи избавивый, быв Человек, страждет яко смертен, и страстию смертное в нетления облачит благолепие, Един благословен отцев Бог и препрославлен.

Жены с миры богомудрыя в след Тебе течаху: Егоже, яко мертва, со слезами искаху, поклонишася радующияся Живому Богу, и Пасху тайную Твоим, Христе, учеником благовестиша.

Смерти празднуем умерщвление, адово разрушение, иного жития, вечнаго, начало, и играюще поем Виновнаго, Единаго благословеннаго отцев Бога и препрославленнаго.

Яко воистинну священная и всепразднственная сия спасительная нощь, и светозарная, светоноснаго дне, востания сущи провозвестница: в нейже безлетный Свет из гроба плотски всем возсия.

Богородицы подобны:

[Υ] Почерпите недугующии исцеления: Всечистая бо точит от божественнаго источника сладость истинную, поток сладости воистинну вреющий, темже и верою токи независтныя почерпем вси.

[Ξ] Удивляют слышащия Владычице, странная Твоя чудеса, вся верныя: немыя бо и глухия, яко благоглаголивыя показует вода Твоя, страждущия же люте врачует, и исцеление дарует.

[Α] Возводиши от пещи скорбей, орошающи водами от страннаго источника, приступающия к Тебе Чистая: каркинския бо раны свобождается человек, прокаженна же исцеляеши, и распаление угасила еси.

[Ν] Юноши и отроковицы Владычицу, и вси человецы верою от души восхвалим светло: сокрушения бо гноевиц, и вреды лукавых, и отоки, и разслабленнаго исцели.

Песнь 8.

Ирмос: Сей нареченный и святый день, Един суббот Царь и Господь, праздников праздник и торжество есть торжеств: воньже благословим Христа во веки.

Приидите, новаго винограда рождения, божественнаго веселия, в нарочитом дни Воскресения Царствия Христова приобщимся, поюще Его яко Бога во веки.

Возведи окрест очи твои, Сионе, и виждь: се бо приидоша к тебе, яко богосветлая светила, от запада и севера, и моря, и востока чада твоя, в тебе благословящия Христа во веки.

Троичен: Отче Вседержителю, и Слове, и Душе, треми соединяемое во Ипостасех Естество, Пресущественне и Пребожественне, в Тя крестихомся и Тя благословим во вся веки.

Богородицы подобны:

[Θ] Божественную источник и честную воду изливает Твой Дево: водных бо течение вспящает зело, призыванием божественным благодати. Темже тя почитаем, источниче, во веки.

[Ο] Вси честную животочную воду воспоим мудренне: злодыхания бо ток по странам уставляет, и свободное творит происхождение. Оле Твоих чудес, Чистая Богородительнице!

[Π] Кая, Всепетая, восхвалят уста Рождества Твоего странное? Но и ум кий бы чудес источник изследовал, и слово изглаголало? Несть естеству крепость, Твоим чудитися.

[Ο] Вся о Тебе смерти держава разорися внезапу, о Царице и Госпоже: ибо Царя Безсмертнаго, живот Ты источила еси, воду, манну, Христа во веки.

Песнь 9.

Величит душа моя воскресшаго тридневно от гроба Христа Жизнодавца.

1-й лик ирмос: Светися, светися, новый Иерусалиме: слава бо Господня на тебе возсия, ликуй ныне и веселися, Сионе. Ты же, Чистая, красуйся, Богородице, о востании Рождества Твоего.

2-й лик: Величит душа моя волею страдавша и погребена, и воскресшаго тридневно от гроба.

И ирмос: Светися:

1-й лик: Христос новая Пасха, Жертва живая, Агнец Божий, вземляй грехи мира.

О Божественнаго, о любезнаго, о сладчайшаго Твоего гласа! С нами бо неложно обещался еси быти до скончания века, Христе: Егоже, вернии, утверждение надежди имуще, радуемся.

2-й лик: Ангел вопияше Благодатней: Чистая Дева, радуйся, и паки реку, радуйся: Твой Сын воскресе тридневен от гроба, и мертвыя воздвигнувый, людие, веселитеся.

О Божественнаго, о любезнаго:

1-й лик: Возбудил еси, уснув, мертвыя от века, царски рыкавый яко от Иуды лев.

О Божественнаго, о любезнаго:

2-й лик: Магдалина Мариа притече ко гробу и, Христа видевши, яко вертоградаря вопрошаше.

О Пасха велия и священнейшая, Христе! О мудросте и Слове Божий, и сило! Подавай нам истее Тебе причащатися в невечернем дни Царствия Твоего.

1-й лик: Ангел облистаяй женам вопияше: престаните от слез, яко Христос воскресе.

О Пасха велия:

2-й лик: Христос воскресе, смерть поправый и мертвыя воздвигнувый, людие, веселитеся.

О Пасха велия:

Богородицы подобны:

1-й лик: Радуйся, Дево, радуйся, радуйся, Благословенная, радуйся, Препрославленная: Твой бо Сын воскресе тридневен от гроба.

[Υ] Воды вся превосходит, Отроковице Чистая, источника Твоего вода, яве дарующая свобождение недугов лютых, и душам всякое здравие, яко паче естества изливаемая.

2-й лик: Радуйся, Дево, радуйся:

Воды вся превосходит:

1-й лик: Радуйся, Дево, радуйся:

[Λ] Решитель недугов новый се Силоам, источника Твоего Дево, зрим вси: очи бо приемлет огня, вси же здравие присно к животу приемлем.

2-й лик: Радуйся, Дево, радуйся:

[Ο] Здравия ищущии притецыте ко источнику: Отроковица бо Дева жительствует при воде. Ликуй и веселися верных множество сице, якоже подобает: иже бо приидет к храму, воздаяние прошений приемлет.

1-й лик: Радуйся, Дево, радуйся:

[Υ] Возвысися источника Твоего вода выше небес, и земли бездны токи претече: сия есть пища души, питие верных, мед из камене, и манны раздаяние.

2-й лик: Радуйся, Дево, радуйся:

[Ε] Веселиши Дево царя преестественне, источающи благодать от источника присносущную, сему подавающи на враги крепость, победы присно, здравие и мир, и прошений исполнение.

Ексапостиларий празднику:

Плотию уснув, яко мертв, Царю и Господи, тридневен воскресл еси, Адама воздвиг от тли и упразднив смерть: Пасха нетления, мира спасение.

И источнику. Подобен:

Источник еси воистинну воды живыя, Владычице: измываеши убо недуги душ и телес лютыя, прикосновением Твоим единым токмо, воду спасения Христа изливающи.

На хвалитех, Всякое дыхание: поставим стихов 8. И поем стихиры воскресны Осмогласника 4, глас 6:

Крест Твой Господи, жизнь и воскресение людем Твоим есть, и надеющеся нань, Тебе воскресшаго Бога нашего поем: помилуй нас.

Погребение Твое Владыко, рай отверзе роду человеческому: и от истления избавльшеся, Тебе воскресшаго Бога нашего поем: помилуй нас.

Со Отцем и Духом Христа воспоим, воскресшаго из мертвых, и к Нему вопиим: Ты живот еси наш, и воскресение, помилуй нас.

Тридневен воскресл еси Христе от гроба якоже писано есть, совоздвигнувый праотца нашего. Темже Тя и славит род человеческий, и воспевает Твое Воскресение.

И Богородицы стихиры, глас 2.

Подобен: Доме Евфрафов:

Вода источника, спасительная есть всем немощствующим: приступим верою, благодать почерпем.

Кладязь животочный источника безсмертнаго, приступающим любовию, исцелений подает излияние неисчерпаемое.

Укрепляет души вода Девыя: иже в сквернах страстей, притецем ко Отроковице, и сия измыем.

Ручка священная, и манна независтная из пречистыя утробы, изливает Владыку: потребу всяческую почерпем.

И стихиры Пасхи, по обычаю их. Ектении, и отпуст. И час первый. Часы Пасхи.