Месяца иулия в 15-й день
На Малей вечерни, на Господи воззвах, поставим стихов 4, и поем стихиры, глас 1.
Подобен: Небесных чинов:
Стих: От стражи утренния до нощи, от стражи утренния, да уповает Израиль на Господа.
Стих: Яко у Господа милость, и многое у Него избавление, и Той избавит Израиля от всех беззаконий его.
Десницею Всевышняго укреплен великий княже Владимире, идольскую прелесть отринул еси, славне, и святым крещением просветився, светом познания Христова землю Русскую озарил еси. [Дважды.]
Стих: Хвалите Господа вси языцы, похвалите Его вси людие.
Начальника нашего во благочестии христианстем, приидите восхвалим, людие Российстии, приснославнаго великаго князя Владимира, идолы поправшаго, и святым крещением землю Русскую просветившаго.
Стих: Яко утвердися милость Его на нас, и истина Господня пребывает во век.
Светоносная твоя память, равноапостоле, днесь возсия нам всерадостно, веселящи души и сердца, твоего богоразумия добротою, великий княже Владимире.
Слава, глас 6. Самогласен:
Днесь страна Российская, яко новаго царя Константина тя стяжавши, светло ликовствует, великий княже Владимире, радостно память твою торжествующи. Мы же, чада твоя, молебно вопием ти: молися, равноапостоле, ко Господу, спасти и просветити души наша.
И ныне, Богородичен, глас тойже:
Никтоже притекаяй к Тебе, посрамлен от Тебе исходит, Пречистая Богородице Дево: но просит благодати, и приемлет дарование к полезному прошению.
На стиховне стихиры, глас 2:
Подобен: Доме Евфрафов:
От земных к небесным прешел еси радуяся, великий княже Владимире, и почесть восприем от Христа Бога, Тому молися, спастися душам нашим.
Стих: Вознесох избраннаго от людей Моих.
Лучами богоразумия просветився, идолы попрал еси, равноапостоле, Христову же веру во отечествии твоем насадил еси.
Стих: Елеем святым Моим помазах его.
Стадо твое соблюди, егоже ко Христову познанию привел еси, великий княже Владимире, и державу Российскую в мире сохраняй присно.
Слава, и ныне, глас 8. Самогласен:
Приидите возрадуемся, Заступницу рода нашего воспевающе днесь, Пречистую Деву Богородицу, Ейже великий князь Владимир храм пречестен созда, и десятину тому от имений своих даяше, емуже подражающе, вместо десятины, песни хвалебныя Ей принесем, зовуще и глаголюще: палато Слова, и светлый чертоже всех Царя, сподоби нас смиренных покрова Твоего, и буди нам Помощнице, во спасении душ наших.
На Велицей вечерни.
На Господи воззвах, стихиры на 8, глас 4:
Подобен: Яко добля:
Стих: От стражи утренния до нощи, от стражи утренния, да уповает Израиль на Господа.
Стих: Яко у Господа милость, и многое у Него избавление, и Той избавит Израиля от всех беззаконий его.
Вторый ты был еси Константин, словом и делом: он во христианское время родися, и многа лета во еллинстве сотворил есть. Ты же от язык родився, но возлюбил еси возлюбившаго тя Христа, к Немуже возшел еси радуяся. Егоже моля не престай, о чтущих память твою.
Стих: Хвалите Господа вси языцы, похвалите Его вси людие.
Стих: Яко утвердися милость Его на нас, и истина Господня пребывает во век.
Веселится вечно светло сияющи гора Синайская, Моисейским освятившися законом, Невидимаго видевши. Светло же сияя веселится и радуется великий град твой, Владимире: не яко во мраце, но яко в Дусе Сына со Отцем видя в себе славима. Егоже моли, спасти и просветити души наша.
Стих: Имене ради Твоего, потерпех Тя Господи, потерпе душа моя в слово Твое, упова душа моя
Стих: Аще беззакония назриши Господи, Господи, кто постоит? Яко у Тебе очищение есть.
Якоже отец духовно, царь же чувственно, Российским людем был еси, Владимире: истинный же проповедатель, яко апостол Христов, провозвестил еси спасительное крещение, и тем светло просветив, освятил еси люди твоя во всех странах царствия твоего, блаженне.
Стих: Да будут уши Твои, внемлюще гласу моления моего.
Стих: Из глубины воззвах к Тебе Господи, Господи, услыши глас мой.
Корень правоверия ты был еси, Владимире, напоен же Духом Пресвятым, возрастивый нам ветви богосажденнеи, цвет благоухания источающии, Бориса чуднаго, и Глеба ревнителя благочестию, кипящии всем верным обильно чудесы. С нимаже предстоя Христу, молися спасти и просветити души наша.
Слава, глас 8:
Приидите стецемся вси в честней памяти отца русскаго, наставника нашего Владимира: сей бо от язык родися, и возлюби возлюбльшаго и Христа, к Немуже взыде радуяся, с праматерию своею Ольгою. Вся бо люди своя научи веровати, и покланятися в Троице единому Богу, идолы же разрушив попра, и израсти нам свои честнеи леторасли, Бориса и Глеба. Темже и мы светло ныне песньми память их верно чтуще, любовию празднуем: да молятся о нас ко Господу: воинству нашему подати победы на поганыя врази, и умирити весь мир, и спасти души наша.
И ныне, Богородичен, глас тойже:
Царь Небесный за человеколюбие на земли явися, и с человеки поживе: от Девы бо Чистыя плоть приемый, и из Нея прошедый с восприятием: един есть Сын, сугуб естеством, но не ипостасию. Темже совершенна Того Бога, и совершенна Человека воистинну проповедающе, исповедуем Христа Бога нашего: Егоже моли Мати Безневестная, помиловатися душам нашим.
Вход, прокимен дне, и чтения три.
Царств третиих чтение.
[Глава 8.] Ста Соломон пред лицем жертвенника Господня, пред всем собором Израилевым, и воздев руце свои на небо, и рече: Господи Боже Израилев, несть бог, якоже Ты на небеси горе, и на земли доле. Аще бо небо, и небо небесе не довлеют Тебе, како дом сей, егоже создах имени Твоему? Обаче и призриши на молитву мою, Господи Боже Израилев, услышати моления и молитву, еюже раб Твой молится пред Тобою, к Тебе днесь. Да будут очи Твои отверсты на дом сей день и нощь, на место сие, о немже глаголал еси: будет имя Мое тамо, еже услышати молитву, еюже молится раб Твой на месте сем, во дни и нощи: и послушати мольбы раба Твоего, и людей Твоих Израиля. И елика аще помолятся к Тебе на месте сем, и Ты услышиши на месте жилища Твоего на небеси: и сотвориши, и милостив будеши им.
Пророчества Исаиина чтение.
[Глава 61.] Да возрадуется душа моя о Господе: облече бо мя в ризу спасения, и одеждею веселия одея мя: яко жениху возложи мне венец: яко невесту украси мя красотою. И яко земля растящая цвет свой, и яко вертоград семена своя прозябает: тако возсияет Господь правду, и радость пред всеми языки. [62] Сиона ради не умолкну, и Иерусалима ради не попущу, дондеже убо изыдет яко свет правда моя, спасение же мое яко свеща разжжется. И узрят языцы правду твою, и вси царие земстии славу твою, и нарекутся именем твоим новым, еже Господь именует е. И будеши венец доброты в руце Господни, и диадима царствия в руце Бога твоего. И ктому не наречешися оставлен, и земля твоя ктому не наречется пуста: тебе бо наречется воля моя, и земля твоя вселенная, яко благоволит Господь в тебе, и земля твоя населится. И яко живый юноша с девою, тако поживут сынове твои с тобою: и будет имже образом возвеселится жених о невесте, тако возвеселится Господь о тебе.
Пророчества Исаиина чтение.
[Глава 60.] Светися, светися, Иерусалиме: прииде бо твой свет, и слава Господня на тебе возсия. Яко се тьма покрыет землю, и мрак на языки: на тебе же явится Господь, и слава Его на тебе узрится. И пойдут царие светом твоим, и языцы светлостию востока твоего. Возведи окрест очи твои, и виждь собранная чада твоя: приидут вси сынове твои издалеча, и дщери твои на рамех возмутся. Тогда узриши и возрадуешися, и убоишися, и ужаснешися сердцем, егда приложит на тя богатство моря, и язык, и людей. И приидут ти стада велблуд, и покрыют тя велблуды Мадиамстии и Гефарстии, вси от Сава приидут, носяще тебе злато и ливан, принесут тебе и камень честен, и спасение от Господа благовестят. И вся овцы Кидарския соберутся тебе, и овни Навеофстии приидут тебе, и вознесутся приятная на жертвенник Мой, и дом молитвы Моея прославится. Кии суть, иже яко облацы летают, и яко голубие со птенцы своими? Со Мною есть Сион, Мене острови ожидаша, и корабли Фарсийстии в первых, еже привести чада твоя издалеча, и сребро, и злато их с ними, за имя Господне святое, и за еже Святому Израилеву славну быти. И созиждут сынове инороднии стены твоя, и царие их предстанут тебе: за гнев бо Мой поразих тя, и за милость Мою возлюбих тя. И отверзутся врата твоя, Иерусалиме, выну день и нощь, и не затворятся, еже ввести к тебе силу языков, и цари их ведомыя. Языцы бо и царие, иже тебе не поработают, погибнут: и языцы запустением запустеют. И слава Ливанова к тебе приидет в кипарисе и певке, и кедре, вкупе, прославити место святое Мое, и место ног Моих прославлю. И пойдут к тебе боящиися, сынове смиривших тя, и прогневавших тя, и поклонятся следам ног твоих вси прогневавшии тя, и наречешися град Господень Сион Святаго Израилева. За еже быти тебе оставлену и возненавидену, и не бе помогаяй тебе: и положу тя в радость вечную, веселие родом родов. И иссеши млеко языков, и богатство царей снеси, и разумееши, яко Аз Господь спасаяй тя, и избавляяй тя Бог Израилев.
На литии стихира храма. Таже святаго, глас 2:
Днесь возсия благочестиваго князя Владимира память, яко миро излиянное: Христа бо возлюбив, идолы преобидев, церкви Распеншемуся нас ради на земли воздвиже, и на небесех прият Царство и венец.
Слава, глас 6:
Приидите, стецемся вси верно к честней памяти отца русскаго, наставника нашего Владимира: сей бо от язык родися, и возлюби возлюбльшаго и Христа: к Немуже и взыде радуяся с праматерию Ольгою. Тем и мы любезно празднуем, молящеся молитися о нас ко Господу, умирити мир, и спасти души наша.
И ныне, Богородичен, глас тойже:
Творец и Избавитель мой Пречистая, Христос Господь из Твоих ложесн прошед, в мя оболкийся, первыя клятвы Адама свободи. Темже Ти Всечистая, яко Божии Матери же и Деве, воистинну вопием немолчно: радуйся ангельски, радуйся Владычице, предстательство и покрове, и спасение душ наших.
На стиховне стихиры, глас 8:
Подобен: О преславнаго чудесе!
О преславнаго чудесе! Величавый разум погубляется днесь, и рыдают вся лукавая воинства, видяще ветвь сущу вседичну, силою Божиею богонасажденну и прославляему, и светло венчаваему от Бога, великаго Владимира, нашего вернаго начальника.
Стих: Вознесох избраннаго от людей Моих.
Дивная чудес пучина, жестосерднии бо разумом, иже вотще шатахуся, от лица днесь Владимирова веселятся в честней Церкви: и царствует Христос Бог, обрет его яко Павла прежде, и постави князя верна на земли Своей, просветившаго люди своя честным крещением.
Стих: Елеем святым Моим помазах его.
Радуйся, русская похвало. Радуйся, верным правителю. Радуйся, божественный Владимире, начальниче наш. Радуйся, веры забрало. Радуйся, чудо чудесем преславное, и притекающим пристанище тихое. Радуйся, всесвятый кореню веры, и молебниче о поющих тя, и величающих верно.
Слава, глас 8:
Начальника благочестия и проповедника веры, и князей русских верховнаго, днесь русстии собори сошедшеся, восхвалим великаго Владимира: апостолом равнаго, хвалами и песньми духовными венчаим его, глаголюще: радуйся, Христов воине прехрабрый, яко томителя врага до конца погубив, и нас от лести его избавив, привел еси Царю Христу Богу. Но, о преблаженне и всехвальне! мир моли подати отечеству нашему, и на поганыя победы, Церкви благостояние и душам нашим велию милость.
И ныне, Богородичен, глас тойже:
Владычице, приими молитвы раб Твоих, и избави нас от всякия нужды и печали.
Тропарь дважды, глас 4:
Уподобился еси купцу, ищущему добраго бисера, славнодержавный Владимире, на высоте стола седя матере градов богоспасаемаго Киева: испытуя же и посылая к Царскому граду уведети православную веру, обрел еси безценный бисер, Христа, избравшаго тя яко втораго Павла, и отрясшаго слепоту во святей купели душевную, вкупе и телесную: темже празднуем твое успение людие твои суще. Моли спастися державы твоея Российския начальником, и множеству владомых.
Дважды, и Богородице Дево: единожды.
|
|