На правах рекламы:

Воздушные фильтры карманного типа ТЕКС.

Неделя о самаряныне и память апостола Иакова

Месяца апреля в 30-й день

Неделя 5-я по Пасце, о самаряныне

Святаго апостола Иакова, брата святаго Иоанна Богослова

В субботу, на Малей вечерни, на Господи, воззвах, стихиры воскресны, 4, глас 4:

Стих: От стражи утренния до нощи, от стражи утренния, да уповает Израиль на Господа.

Животворящему Твоему Кресту, непрестанно кланяющеся Христе Боже, тридневное Воскресение Твое славим: тем бо обновил еси истлевшее человеческое естество Всесильне, и иже на небеса восход обновил еси нам, яко един Благ и Человеколюбец.

Стих: Яко у Господа милость, и многое у Него избавление, и Той избавит Израиля от всех беззаконий его.

Древа преслушания запрещение разрешил еси Спасе, на древе Крестнем волею пригвоздився, и во ад сошед Сильне, смертныя узы яко Бог растерзал еси. Темже кланяемся еже из мертвых Твоему Воскресению, радостию вопиюще: всесильне Господи, слава Тебе.

Стих: Хвалите Господа вси языцы, похвалите Его вси людие.

Врата адова сокрушил еси Господи, и Твоею смертию смертное царство разрушил еси, род же человеческий от тления свободил еси, живот и нетление миру даровав, и велию милость.

Иная стихира восточна {анатолиева}:

Стих: Яко утвердися милость Его на нас, и истина Господня пребывает во век.

Приидите воспоим людие, Спасово тридневное востание, имже избавихомся адовых нерешимых уз, и нетление и жизнь вси восприяхом, зовуще: распныйся, и погребыйся, и воскресый, спаси ны Воскресением Твоим, едине Человеколюбче.

Слава, глас 8:

Приидите, небеснаго таинства проповедателя, и сказателя Евангелиа, псаломскими песньми Иакова вси восхвалим: сей бо река явися мысленнаго рая, душевныя бразды небесными тучами напаяя, и плодоносны показуя Христу Богу, подающему всем молитвами его очищение, и просвещение, и велию милость.

И ныне: Богородичен, догматик. Глас 4:

Безсеменно зачала еси, и родила еси неизреченно, низложившаго сильныя от престол, и вознесшаго смиренныя, и воздвигшаго рог помазанных Своих, славящих Христов Крест и погребение, и славное Воскресение. Темже Тя Богородице, ходатаицу толиких благ, немолчными песньми ублажаем, яко молящуюся присно спастися душам нашим.

На стиховне стихира воскресна, глас 4:

Господи возшед на Крест, прадеднюю нашу клятву потребил еси, и сошед во ад, яже от века узники свободил еси, нетление даруя человеческому роду. Сего ради поюще славим животворящее и спасительное Твое востание.

И святаго, глас 8.

Подобен: О преславнаго чудесе!

Блаженне боговидче Иакове, ты Слова глас абие восприем, о отеческом небрегл еси угождении и любви: оставль убо жития смущение, в мысленное же прешед море, сие возмутил еси благочестия учении, и зарями премирными твоими, богоблаженне.

Стих: Во всю землю изыде вещание их, и в концы вселенныя глаголы их.

Слова самовидче Иакове, Начальника жизни, и Отцу будущих угождая деянии, Исмаила всесквернаго первенства, блаженне, лишил еси, чрево яко бога вменяюща. Егоже и запял еси, и нага показал еси отеческаго покрова, благословения же и наследия непричастна.

Стих: Небеса поведают славу Божию, творение же руку Его возвещает твердь.

Князь поставлен был еси, славне, ныне по всей земли, о тебе якоже прежде написася, ученик быв вся Сотворшаго, и ревностию твоею теплейшею, и дерзновением непобедимым убийство претерпел еси, от честнаго двоенадесятих ученик, блаженне, совокупления, первее убиваемый.

Слава, глас 1:

Христу последовал еси, божественный Иакове, и мир возненавидел еси, Сего учения в сокровищи твоем скрыв, показался еси апостол. Темже шед во языки, и сих прелестию и страстьми омрачившияся души, заповедьми Спаса просветил еси, веровати в Троицу Единосущную.

И ныне, праздника, глас 8:

Егда явился еси во плоти Христе Боже, за неизреченное смотрение, слышавши самаряныня слово Тебе Человеколюбца, остави почерпало у студенца, и тече глаголющи сущим во граде: приидите видите Сердцеведца, еда Сей есть чаемый Христос, имеяй велию милость?

Тропарь воскресен, глас 4:

Светлую Воскресения проповедь, от ангела уведевше Господни ученицы, и прадеднее осуждение отвергше, апостолом хвалящеся глаголаху: испровержеся смерть, воскресе Христос Бог, даруяй мирови велию милость.

Слава, святаго, глас 3:

Апостоле святый Иакове, моли милостиваго Бога, да прегрешений оставление подаст душам нашим.

И ныне, Богородичен. Глас тойже:

Тя ходатайствовавшую спасение рода нашего, воспеваем Богородице Дево: плотию бо от Тебе восприятою Сын Твой, и Бог наш, Крестом восприим страсть, избави нас от тли яко Человеколюбец.

Ектениа малая, и отпуст.

На Велицей вечерни

По обычной кафисме, на Господи, воззвах: стихиры воскресны гласа, 3, глас 4:

Стих: Изведи из темницы душу мою, исповедатися имени Твоему.

Животворящему Твоему Кресту, непрестанно кланяющеся Христе Боже, тридневное Воскресение Твое славим: тем бо обновил еси истлевшее человеческое естество Всесильне, и иже на небеса восход обновил еси нам, яко един Благ и Человеколюбец.

Стих: Мене ждут праведницы, дондеже воздаси мне.

Древа преслушания запрещение разрешил еси Спасе, на древе Крестнем волею пригвоздився, и во ад сошед Сильне, смертныя узы яко Бог растерзал еси. Темже кланяемся еже из мертвых Твоему Воскресению, радостию вопиюще: всесильне Господи, слава Тебе.

Стих: Из глубины воззвах к Тебе Господи, Господи, услыши глас мой.

Врата адова сокрушил еси Господи, и Твоею смертию смертное царство разрушил еси, род же человеческий от тления свободил еси, живот и нетление миру даровав, и велию милость.

И самаряныни самогласны 3, глас 1.

Стих: Да будут уши Твои, внемлюще гласу моления моего.

На источник пришел еси, источниче чудес, в шестый час, Евин уловити плод: Ева бо в той изыде из рая, прелестию змиевою. Приближи бо ся самаряныня почерпсти воду, юже видев рече Спас: даждь Ми воду пити, и Аз воды текущия насыщу тя. И во град текши целомудренная, народом возвести абие: приидите видите Христа Господа, Спаса душ наших.

Глас 2:

Стих: Аще беззакония назриши Господи, Господи, кто постоит? Яко у Тебе очищение есть.

На студенец яко прииде Господь, самаряныня моляше Благоутробнаго: подаждь ми воду веры, и прииму купельныя воды, радование и избавление. Животодавче Господи, слава Тебе.

Стих: Имене ради Твоего, потерпех Тя Господи, потерпе душа моя в слово Твое, упова душа моя на Господа.

Собезначальный и соприсносущный Сын и Слово Отчее, на источник прииде, источник исцелений, и жена от Самарии прииде почерпсти воду, юже видев рече Спас: даждь Ми воду пити, и шедши пригласи твоего мужа. Она же яко Человеку глаголющи, а не Богу, утаити тщашеся, глаголаше: не имам мужа. И Учитель к ней: истину рекла еси, не имам мужа: пять бо имела еси, и ныне егоже имаши, несть твой муж. Она же о глаголе удивившися, и во град текши, народом вопияше, глаголющи: приидите видите Христа, Иже дарует мирови велию милость.

И святаго, 4, глас 4.

Подобен: Яко добля:

Стих: От стражи утренния до нощи, от стражи утренния, да уповает Израиль на Господа.

Тростию благодатною из глубины суетства человеки извлекл еси, досточудне, Учителя мановением повинуяся, Иакове, просвещшаго по всему твою мысль, и апостола и честна богогласника, тя, преблаженне, показавшаго, Сего непостижимаго Божества.

Стих: Яко у Господа милость, и многое у Него избавление, и Той избавит Израиля от всех беззаконий его.

Духовное сияние на тя сниде в виде огненне, и тя, блаженне, божественное приятелище содела, крепко отгоняща безбожия тьму, и мир просвещающа светлостию премудрых твоих словес, тайноповедателю, апостолов верше, Христов самовидче Иакове.

Стих: Хвалите Господа вси языцы, похвалите Его вси людие.

Блистании проповедания во тьме спящия неведения, славне Иакове, просвещь, показал еси сыны верою Владыки и Бога. Егоже страсти поревновал еси и смерти, и славы был еси причастник, яко премудр, и яко богогласник, и яко ученик истинен.

Глас 8:

Стих: Яко утвердися милость Его на нас, и истина Господня пребывает во век.

Приидите, небеснаго таинства проповедателя, и сказателя Евангелиа, псаломскими песньми Иакова вси восхвалим: сей бо река явися мысленнаго рая, душевныя бразды небесными тучами напаяя, и плодоносны показуя Христу Богу, подающему всем молитвами его очищение, и просвещение, и велию милость.

Слава, праздника, глас 6:

При студенце Иаковли обрет Иисус самаряныню, просит воду от нея, облаками покрываяй землю. О чудесе! Иже херувимы носимый, блуднице жене беседоваше, воды прося, Иже на водах землю повесивый, воды иский, Иже источники и езера вод изливаяй, хотя привлещи сию воистинну, уловляему от сопостата врага, и напоити ю водою живою, палимую в безместиих люте, яко един Благоутробный и Человеколюбец.

И ныне: Богородичен, глас 4:

Иже Тебе ради, богоотец пророк Давид, песненно о Тебе провозгласи, величия Тебе сотворшему: предста Царица одесную Тебе. Тя бо Матерь ходатаицу живота показа, без Отца из Тебе вочеловечитися благоволивый Бог: да Свой паки обновит образ, истлевший страстьми, и заблуждшее горохищное обрет овча, на рамо восприим, ко Отцу принесет, и Своему хотению, с небесными совокупит силами, и спасет Богородице мир, Христос имеяй велию и богатую милость.

Вход. Прокимен дне, и чтения святаго 3.

Соборнаго послания Иаковля чтение. [Глава 1.]

Иаков Богу и Господу Иисусу Христу раб, обеманадесяте коленома, иже в разсеянии, радоватися. Всяку радость имейте, братие моя, егда во искушения впадаете различна, ведяще, яко искушение вашея веры соделовает терпение: терпение же дело совершенно да имать, яко да будете совершени и всецели, ни в чем же лишени. Аще же кто от вас лишен есть премудрости, да просит от дающаго Бога всем нелицеприемне, и не поношающаго, и дастся ему. Да просит же верою, ничтоже сумняся: сумняйся бо уподобися волнению морскому, ветры возметаему и развеваему. Да не мнит бо человек он, яко приимет что от Бога. Муж двоедушен неустроен во всех путех своих. Да хвалится же брат смиренный в высоте своей: богатый же во смирении своем: зане якоже цвет травный мимо идет. Возсия бо солнце со зноем, и изсуши траву, и цвет ея отпаде, и благолепие лица ея погибе: сице и богатый в хождении своем увядает. Блажен муж, иже претерпит искушение, зане искусен быв, приимет венец жизни, егоже обеща Бог любящим Его.

Соборнаго послания Иаковля чтение. [Глава 1, стих 13.]

Никтоже искушаемь да глаголет, яко от Бога искушаемь есмь: Бог бо несть искуситель злым, не искушает же Той никогоже. Кийждо же искушается, от своея похоти влекомь и прельщаемь. Таже похоть заченши раждает грех: грех же содеян раждает смерть. Не льститеся, братия моя возлюбленная. Всяко даяние благо, и всяк дар совершен свыше есть, сходяй от Отца светов, у Негоже несть пременения, или преложения стень. Восхотев бо, породи нас словом истины, во еже быти нам начаток некий созданием Его. Темже, братия моя возлюбленная, да будет всяк человек скор услышати, и косен глаголати, косен во гнев. Гнев бо мужа, правды Божия не соделовает. Сего ради отложше всяку скверну, и избыток злобы, в кротости приимите всажденное слово, могущее спасти души ваша. Бывайте же творцы слова, а не точию слышатели, прельщающе себе самех. Зане аще кто есть слышатель слова, а не творец, таковый уподобися мужу, смотряющу лице бытия своего в зерцале: усмотри бо себе, и отыде, и абие забы, каков бе. Приникий же в закон совершен свободы, и пребыв, сей не слышатель забытлив быв, но творец дела, сей блажен в делании своем будет. Аще кто мнится верен быти в вас, и не обуздавает языка своего, но льстит сердце свое, сего суетна есть вера. Вера бо чиста и нескверна пред Богом и Отцем сия есть, еже посещати сирых и вдовиц в скорбех их, и нескверна себе блюсти от мира.

Соборнаго послания Иаковля чтение. [Глава 2.]

Братие моя, не на лица зряще, имейте веру Господа нашего Иисуса Христа славы. Аще бо внидет в сонмище ваше муж, злат перстень нося, в ризе светле, внидет же и нищ в худе одежде, и воззрите на носящаго ризу светлу, и речете ему: ты сяди зде добре, и нищему речете: ты стани тамо, или сяди зде на подножии моем: и не разсмотристе в себе, и бысте судии помышлений злых. Слышите, братие моя возлюбленная, не Бог ли избра нищия мира сего, богаты в вере, и наследники Царствия, еже обеща любящим Его? Вы же укористе нищаго. Не богатии ли насилуют вам, и тии влекут вы на судища? Не тии ли хулят доброе имя, нареченное на вас? Аще убо закон совершаете царский, по писанию: возлюбиши искренняго своего, якоже себе самаго: добре творите. Аще ли на лица зрите, то грех содеваете, обличаеми от закона, якоже преступницы. Иже бо весь закон соблюдет, согрешит же во едином, бысть всем повинен. Рекий бо: не прелюбы сотвориши, рекл есть и: не убиеши. Аще же не прелюбы сотвориши, убиеши же, был еси преступник закона. Тако глаголите и тако творите, яко законом свободным имущии суд прияти. Суд бо без милости не сотворшему милости: и хвалится милость на суде.

На литии, стихира храма, и святаго, глас 8.

Подобен: О преславнаго чудесе!

Блаженне боговидче Иакове, ты Слова глас абие восприем, о отеческом небрегл еси угождении и любви: оставль убо жития смущение, в мысленное же прешед море, сие возмутил еси благочестия учении, и зарями премирными твоими, богоблаженне.

Слова самовидче Иакове, Начальника жизни, и Отцу будущих угождая деянии, Исмаила всесквернаго первенства, блаженне, лишил еси, чрево яко бога вменяюща. Егоже и запял еси, и нага показал еси отеческаго покрова, благословения же и наследия непричастна.

Слава, святаго, глас и подобен тойже:

Князь поставлен был еси, славне, ныне по всей земли, о тебе якоже прежде написася, ученик быв вся Сотворшаго, и ревностию твоею теплейшею, и дерзновением непобедимым убийство претерпел еси, от честнаго двоенадесятих ученик, блаженне, совокупления, первее убиваемый.

И ныне, праздника. Глас 3:

Да радуется днесь светло небо и земля, зане Христос явися воплощаемь яко Человек, да Адама измет от клятвы всеродныя, и удивляется чудесы Самарию пришед: жене же предста воды прося, облаки водами одеваяй. Темже вси вернии покланяемся нас ради волею обнищавшему, благоутробным советом.

На стиховне стихира воскресна, глас 4:

Господи возшед на Крест, прадеднюю нашу клятву потребил еси, и сошед во ад, яже от века узники свободил еси, нетление даруя человеческому роду. Сего ради поюще славим животворящее и спасительное Твое востание.

И стихиры Пасце, с припевы их:

Стих: Да воскреснет Бог и расточатся врази Его.

Пасха священная нам днесь показася: Пасха нова святая: Пасха таинственная: Пасха всечестная: Пасха Христос Избавитель: Пасха непорочная: Пасха великая: Пасха верных: Пасха, двери райския нам отверзающая: Пасха, всех освящающая верных.

Стих: Яко исчезает дым, да исчезнут.

Приидите от видения, жены благовестницы, и Сиону рцыте: приими от нас радости благовещения Воскресения Христова: красуйся, ликуй и радуйся, Иерусалиме, Царя Христа узрев из гроба, яко жениха происходяща.

Стих: Тако да погибнут грешницы от Лица Божия, а праведницы да возвеселятся.

Мироносицы жены, утру глубоку предсташа гробу Живодавца, обретоша Ангела на камени седяща, и той, провещав им, сице глаголаше: что ищете Живаго с мертвыми? Что плачете Нетленнаго во тли? Шедше, проповедите учеником Его.

Стих: Сей день, егоже сотвори Господь, возрадуемся и возвеселимся в онь.

Пасха красная, Пасха, Господня Пасха! Пасха всечестная нам возсия. Пасха! Радостию друг друга обымем. О Пасха! Избавление скорби, ибо из гроба днесь, яко от чертога, возсияв Христос, жены радости исполни, глаголя: проповедите апостолом.

Слава, святаго, глас 1:

Христу последовал еси, божественный Иакове, и мир возненавидел еси, Сего учения в сокровищи твоем скрыв, показался еси апостол. Темже шед во языки, и сих прелестию и страстьми омрачившияся души, заповедьми Спаса просветил еси, веровати в Троицу Единосущную.

И ныне, праздника. Глас 8:

Егда явился еси во плоти Христе Боже, за неизреченное смотрение, слышавши самаряныня слово Тебе Человеколюбца, остави почерпало у студенца, и тече глаголющи сущим во граде: приидите видите Сердцеведца, еда Сей есть чаемый Христос, имеяй велию милость?

На благословении хлебов, тропарь, Богородице Дево: трижды, и чтение в Деяниих апостольских.