14 ноября. Святаго и всехвальнаго апостола Филиппа.
[зри] Подобает ведати: яко заутра начинаем пост к Рождеству Христову, святую 40-цу. Должни есмы в сей 40-це сохраняти в коейждо седмице три дни, постящеся от елеа и вина, понедельник, среду и пяток. Точию аще случится великий святый, в того бо память разрешаем, и творим за любовь святаго праздника его ради, еже есть сего месяца 16, 25, 30. Декемвриа 4, 5, 6, 9, 17, 20 день. В те бо дни, аще во вторник и в четверток, ядим рыбу. В понедельник же, в среду и в пяток, разрешаем точию на елей и вино, рыбы же не ядим, кроме храма. Аще ли единому от сих во обители храм, разрешаем на рыбу и вино. Введение же Богородицы в кийлибо день случится, аще в среду, или пяток разрешаем и на рыбы.
[зри] Нецыи же уставы от 9-го числа декемвриа повелевают поститися, и на рыбы не разрешати, кроме суббот, и недель, и храма святаго. от 20-го же числа, даже до 25, аще и суббота и неделя случится, не разрешаем на рыбы.
[зри] Ведати подобает и сие: яко аще случится начало сего поста в субботу, или неделю, в два сия дни глаголем на Бог Господь, тропарь святых исповедник, и по 6-й песни кондак их: и самогласны стихиры их, на своем ряду. Аще ли случится во един от пяти дней седмицы, еже есть от понедельника до пятка, не подобает пети им тропаря, но Аллилуиа чести ради святыя 40-цы, и тоя ради начала. Кондак же святых исповедник по 6-й песни глаголем, вместо мученична. Егда же в тыя дни случится Аллилуиа, творим единою днем ясти: поем же все возследование с поклоны, якоже и в Великую четыредесятницу. Часы же поем с междочасием, без Псалтири и без чтения, и все возследование поем с поклоны, якоже во святую 40-цу: тогда же и ядим единою днем сухоядение.
[зри] Ведати и сие подобает: яко в первый день, в начале Вечерни, того пощения, ниже Трисвятаго глаголем, ниже поклоны творим, ниже Аллилуиа поем: но прокимен дневный. от Сподоби Господи, начинаем поклоны, и творим 3 поклоны. И по Ныне отпущаеши: на Трисвятом 3 поклоны. По Отче наш, глаголем тропари: Богородице Дево радуйся: с поклоны, по образу святыя четыредесятницы. Господи помилуй, 40, кротким гласом, и равно вси. Таже, Честнейшую: иерей, Сый благословен: Мы же молитву: Небесный Царю: и творим три великия поклоны, с молитвою святаго Ефрема: Господи и Владыко живота моего: Таже, глаголет иерей: Слава Тебе, Христе Боже, упование наше, слава Тебе. И отпуст. Повечерие же поем малое с начала без поклонов. Точию на Слава в вышних, три поклоны. На Трисвятом три поклоны. По Иже на всякое время: и по Честнейшую, три поклоны великия, с молитвою святаго Ефрема, и прочия 12. И последи молитву всю вышеписанную: Господи и Владыко живота моего: И поклон великий, и наконец, по Трисвятом, 3 поклоны, и отпуст. На Полунощнице по обычном начале, чтец: Слава Тебе, Боже наш: и Царю Небесный: и поем Полунощницу всю от начала с поклоны, якоже предписася во вседневней службе. По отпусте Полунощницы, вшед в церковь, творит иерей начало по обычаю: и чтец Трисвятое без поклонов, и прочее, яко предписася во вседневней службе. На Утрени, по шестопсалмии вместо Бог Господь, поем Аллилуиа, на глас Октоиха, и Троичны гласа. Таже кафисмы: и по коейждо Славе творим поклоны 3. Седальны Октоиха, и Богородичны, и чтения. Канон Октоиха, 1-й со ирмосом на 6: вторый же на 4: И Минеи святаго, на 4. По 3-й песни, седален святаго, и Богородичен. По 6-й песни, кондак святаго, аще имать: аще же ни, глаголем мученичен Октоиха. По 9-й песни, светилен гласа Троичен, трижды. На Слава в вышних, поклоны три. На стиховне Октоиха. Таже, Благо есть: единожды. И Трисвятое: и поклоны три. По Отче наш, тропарь: В храме стояще: Господи помилуй, 40. Честнейшую: иерей, Сый благословен: Таже, Небесный Царю: и поклоны 3 великия: и прочих 12. И последи поклон великий, с молитвою святаго Ефрема. Такоже и час 1-й, с поклоны, якоже и в Великую святую 40-цу: точию без кафисмы. Заутра же Услыши глас мой, Царю мой и Боже мой: поскору без пения. Подобно же и прочия часы.
[зри] В сию же 40-цу на часех и на Повечерии, не стихословим с пением, ниже тропари поем со гласом: но вся тропари, и Богородичны, и С нами Бог, скоро без пения глаголем. Поем же и междочасие 1-го, 3-го, 6-го и 9-го часа. По отпусте же, хотящии спастися, от своих келлий да не исходят до клепания церковнаго: но ови убо на пение укрепляются, овии же на чтение со вниманием, друзии же на рукоделие упражняются: вся же таковая творят с разсуждением настоящаго. Служебницы же внемлют о службах своих. В час же третий клеплет в малое било, и собравшеся во храм, благословившу иерею: Предстоятель, или чтец глаголет: Слава Тебе Боже наш: Царю Небесный: и Трисвятое, и поклоны 3. По Отче наш: Господи помилуй 12. Приидите поклонимся: трижды. И поклоны три: и обычныя псалмы. Слава, и ныне, Аллилуиа, трижды, и поклоны 3. Таже тропарь, глас 6, [среди церкве глаголется от священника, или от канонарха:] Господи, Иже Пресвятаго Твоего Духа: весь до конца. Тоже глаголет первый лик, дважды: Вторый, единожды. Глаголет же священник: Стих, Сердце чисто созижди во мне, Боже: Стих: Не отвержи мене от лица Твоего: Таже, Слава: Посем учиненный чтец глаголет: И ныне, Богородице, Ты еси лоза истинная: и Господь Бог благословен: Трисвятое, и поклоны 3. По Отче наш, тропари, глас 8: Благословен еси Христе, Боже наш: Слава, Скорое и известное: И ныне, Надежда и предстательство: Господи помилуй, 40. И молитва: Иже на всякое время: Господи помилуй, трижды. Слава, и ныне: Честнейшую херувим: иерей, Боже ущедри ны, и благослови ны: и поклоны 3 великия, с молитвою: Господи и Владыко живота моего: и прочих 12, и последи великий поклон, с молитвою. Таже молитва: Владыко Боже, Отче Вседержителю: и посем, Приидите, поклонимся: трижды: и поклоны 3. И глаголем междочасие 3-го часа, псалом 29: Вознесу Тя Господи, яко подъял мя еси: псалом 31: Блажени, ихже оставишася беззакония: псалом 60: Услыши Боже моление мое: Посем, Слава, и ныне, Трисвятое, и поклоны 3. По Отче наш, тропарь, глас 4: Боже отец наших: Слава, Мученицы Твои Господи: И ныне, Стена необоримая: Господи помилуй, 40. Слава, и ныне: Честнейшую херувим: иерей, Молитвами святых отец наших: и поклоны 3 великия. И посем молитва Великаго Василиа: Господи Боже наш, Твой мир давый учеником: Присовокупляем же и час 6-й, с поклоны, якоже предречеся. И по 16 поклонех, и по молитве: Владыко Боже Отче Вседержителю: Приидите, поклонимся, трижды: и поклоны 3. И глаголем междочасие 6-го часа, псалом 55: Помилуй мя Боже, яко попра мя человек: псалом 56, Помилуй мя Боже, помилуй мя: псалом 69: Боже, в помощь мою: Слава, и ныне, Трисвятое, и поклоны 3. Тропарь, глас 1: Спаси Господи люди Твоя: Слава, Болезньми святых: И ныне, Молитвами Господи всех святых: Господи помилуй, 40. Слава, и ныне, Честнейшую херувим. Иерей, Молитвами святых отец наших: и поклоны три великия, с молитвою святаго Ефрема, и посем молитва Великаго Василиа: Боже и Господи сил: Присовокупляем же 9-й час, с поклоны, якоже предречеся, и по 16 поклонех, и по молитве, глаголем: Приидите поклонимся, трижды: и поклоны 3. И глаголем междочасие 9-го часа, псалом 112: Хвалите отроцы Господа: псалом 137: Исповемся Тебе, Господи, всем сердцем моим: псалом 139: Изми мя Господи от человека лукава, от мужа неправедна избави мя. Слава, и ныне, Трисвятое, и поклоны 3. По Отче наш, тропарь, глас 8: Просветивый земныя Крестом: Слава, Яко разбойник: И ныне, Нас ради Распятаго: Господи помилуй, 40. Слава, и ныне: Честнейшую херувим: иерей: Молитвами святых отец наших: и великия 3 поклоны. Посем молитва Великаго Василиа: Владыко Господи, Иисусе Христе, Боже наш: Посем, Благослови душе моя Господа: Слава, Хвали душе моя Господа: И ныне, Единородный Сыне: И Во Царствии Твоем: и блаженна гласа. Апостол и Евангелие ряд. И Помяни нас Господи: просто без пения, и поклоны 3. По Отче наш: кондак храма, и дне, и святаго ряд. Слава, Со святыми упокой: И ныне, Богородицы храма, или Предстательство христиан: Господи помилуй, 40, Слава, и ныне, Честнейшую херувим: иерей: Боже ущедри ны и благослови ны: и поклоны 3 великия, и прочих 12: и последи поклон великий. Таже Трисвятое, и поклоны 3: и посем, Господи помилуй, 12. И молитва: Всесвятая Троице: и на Буди имя Господне, поклоны 3. Таже псалом 33: Благословлю Господа на всякое время: И отпуст. И входим к трапезу, и ядим сухоядение. И отходим кийждо в келлию свою.
[зри] Ведомо буди: яко егда поем Аллилуиа, и часы с междочасием, творим же и поклоны, и пост: тогда Литургиа не бывает на соборе, по Типиком: И попразднствовавше мало, и клепанию бывшу, собираемся во храм. И аще убо будет Бог Господь: бывает служба святаго, якоже указует ряд. Аще же есть Аллилуиа, вся Вечерня с поклоны от начала, такожде и Повечерие великое. От Внегда призвати ми: неизменно вся с поклоны. Сей чин и правило бывает непременно, якоже в посте Христова Рождества: такожде и в пост святых апостол, известно яко егда случится Аллилуиа.
|
|